Nuusdag is Nuuspod se daaglikse nuusbulletin om 18:00 In die nuusbulletin: Plaaslike verkiesings verloop goed ten spyte van haakplekke ‘n Ma wat deur haar seun aangeval is, sterf En Leon Schuster is nie dood nie, lank lewe Leon Schuster. Ten spyte van ‘n paar haakplekke hier en daar verloop die plaaslike verkiesings landwyd goed, sê Sy Mamabolo, die hoofkiesbeampte van die Verkiesingskommissie. Teen 12uur vanmiddag het 3,5 miljoen mense reeds hul kruisies getrek. Volgens Mamabolo is daar onmiddellik werk gemaak van probleme wat op sommige plekke kop uitgesteek het. Daar word onder meer ondersoek ingestel na ‘n joernalis van Newzroom Africa wat in hegtenis geneem is asook ‘n paar gevalle van verkiesingsbedrog. In al die gevalle wat aangemeld is, is die betrokke beamptes onmiddellik in hegtenis geneem, sê Mamabolo. Die leier van die Vryheidsfront Plus, dr Pieter Groenewald sê hoewel die party positief oor die verkiesings is, bly hy bekommerd oor die hoeveelheid ongerymdhede. ‘n Ma van Centurion wat verlede jaar 36 keer met ‘n mes gesteek is in ‘n aanval by hul huis is die naweek dood. Magda van Heerden en haar man Barney is op 10 Januarie verlede jaar in die vroeë oggendure aangeval. Hul seun Ruan en ‘n vriend Colson Phelps is in verband met die aanval in hegtenis geneem op aanklagte van poging tot moord en roof met verswarende omstandighede. Magda was vier maande in die hospitaal. Van die steekwonde was so diep dat dit haar ingewande beskadig het. Sy het nooit volkome van haar beserings herstel nie. Die polisie in Phoenix, KwaZulu-Natal het ‘n 57-jarige man aangekeer in verband met moord en brandstigting. Dit volg na vyf mense vroeg vanoggend tydens ‘n brand in ‘n woonstel dood is. Volgens die polisie is die man by familielede se huis in die omgewing van Phoenix in hegtenis geneem. Hy is met ernstige brandwonde in die hospitaal opgeneem, waar hy onder polisiebewaking is. Leon Schuster is nie dood nie. En hy het dit self aan Nuuspod gesê. Die bekende komediant en fliekmaker is vir die soveelste keer op sosiale media dood verklaar. Hy vertel dat ‘n vriend hom vanoggend onophoudelik gebel het terwyl hy in vergadering was en nie die oproep kon antwoord nie. Later toe hy wel oproepe kon antwoord het mense al selfs van Namibië af gebel om te hoor of hy regtig dood is. Schuster sê hy is glad nie beïndruk met die soort grappies nie, aangesien ‘n mens nie met die dood spot nie. Wêreldleiers moet begin om die erns van klimaatverandering te besef, sê die premier van Brittanje, Boris Johnson. Johnson het tydens die opening van die Verenigde Nasies se beraad oor klimaatsverandering in Glasgow Skotland gepraat. Hy het afgevaardigdes van regoor die wêreld gewaarsku dat die effek van aardverwarming vernietigend kan wees. Groot stede soos Miami, Aleksandrië en Sjangai sal onder die golwe verswelg word, sê Johnson. Die sekretaris-generaal van die VN, Antonio Gutteres het in sy toespraak eweneens benadruk dat wêreldleiers nou meer as ooit ‘n gesindheidsverandering oor klimaatsverandering moet ondergaan. Volgens berigte in Wallis oorweeg die afrigter Wayne Pivac dit om beide Gareth Anscombe en Dan Biggar weg te laat uit die beginspan vir Saterdag se toets teen die Springbokke. Walesonline.co.za het ‘n moontlike Walliese span aangewys na die span se nederlaag van 54-16 teen Nieu Seeland. Verskeie beserings aan sleutelspelers besorg die span op die oomblik hoofbrekens. Biggar wat nie beskikbaar was vir Saterdag se toets nie, is soos kaptein Alun Wyn Jones nou ook op die krukkelys. Bespiegelinge oor die Walliese span wil dit hê dat Rhys Priestland Saterdag dalk op nommer tien uitdraf. Voormalige spelers van Indië se nasionale krieketspan en ander kommentators is roskam die span nadat hulle Sondag teen Nieu Seeland in die T20 Werelbeker toernooi verloor het. Die Indiers het nog glad nie ‘n wedstryd by die toernooi gewen nie. Dit lyk dus hoogs onwaarskynlik dat Indie, een van die vooraf gunstelinge om die toernooi te wen, die uitspeelrondes gaan haal. Indie kon Sondag net 110/7 in 20 boulbeurte behaal waarna die Kiwis die wenlopies reeds in die 15de boulbeurt aangeteken het vir ‘n telling van 111/2. ... https://www.youtube.com/watch?v=w14DdjBpJjk

Bankbesonderhede: Nuuspod Pty Ltd ABSA Tjekrekening 4101 228 985 Stroomop is Nuuspod se daaglikse kommentaar op koerantvoorblaaie en ander aanlyn nuus. ... https://www.youtube.com/watch?v=ZYskoLmEAY4